පරාර්ථකාමී උදාර සිතුවිලි සමගින් සමාජ සත්කාර සේවයන්හි නිරත වන ශ්රද්ධා රූපවාහිනී සමාජ සත්කාර අංශය මෙල්බර්න් මහමෙව්නාව භාවනා අසපුවත් ඩී.පී. පදනමත් සමඟින් එක් වී ශ්රී ලංකාවේ රෝහල් පද්ධතිය වෙත දැඩිසත්කාර ඒකක රෝහල් ඇඳන් ඇතුළු අත්යවශ්ය රෝහල් උපකරණ පරිත්යාග කිරීමේ උතුම් පුණ්ය ව්යාපෘතියක් ක්රියාවට නංවා තිබේ.
මහමෙව්නාව භාවනා අසපු සංචිතයේ සහ ශ්රද්ධා මාධ්ය ජාලයේ නිර්මාතෘවර අතිපූජ්ය කිරිබත්ගොඩ ඤාණානන්ද පින්වත් ලොකු ස්වාමීන් වහන්සේගේ ආශීර්වාදයෙන් හා මඟපෙන්වීම යටතේ ක්රියාත්මක වන මෙම පුණ්ය කර්මයේ තවත් එක් අදියරක් සනිටුහන් කරමින් 2026-01-22 දින ශ්රද්ධා රූපවාහිනිය සුපිහිටි කඩුවෙල මහමෙව්නාව බෝධිඤාණ භාවනා අසපුවේ බෞද්ධ සම්මන්ත්රණ ශාලා පරීශ්රයේ දී 09 වන වරටත් රෝහල් ඇඳන් පරිත්යාග කිරීමේ පින්කමක් සාර්ථකව පවත්වනු ලැබිණි. ඒ ඔස්සේ දිවයිනේ තෝරාගත් රෝහල් 11 ක විකලාංග ශල්ය වෛද්ය ඒකක සඳහා රුපියල් මිලියන 74කට අධික වටිනාකමකින් යුත් රෝහල් ඇඳන් 185 ක් පරිත්යාග කරන ලදි.
ඒ අනුව පුත්තලම මූලික රෝහල, කොළඹ රිජ්වේ ආර්යා ළමා රෝහල, මොණරාගල දිස්ත්රික් මහ රෝහල, ත්රිකුණාමලය මහ රෝහල, කුලියාපිටිය ශික්ෂණ රෝහල, ගම්පහ දිස්ත්රික් මහ රෝහල, මාතලේ දිස්ත්රික් මහ රෝහල, නාවලපිටිය දිස්ත්රික් මහ රෝහල, වව්නියාව දිස්ත්රික් මහ රෝහල, මඩකලපුව ශික්ෂණ රෝහල සහ කුරුණෑගල ශික්ෂණ රෝහල සඳහා රෝහල් ඇඳන් පරිත්යාග කිරීම සිදුවිය.
සේරුවිල මංගල රාජමහා විහාරාධිපති ශ්රද්ධා මාධ්ය ජාලයේ ගරු අනුශාසක පූජ්ය අලුදෙණියේ සුබෝධි නාහිමිපාණන් වහන්සේ වරප්රමුඛ මහාසඟ රුවනේ වැඩමවීමෙන් පැවැත්වුණු මෙම උතුම් පුණ්ය කර්මයේ ප්රධාන ආරාධිතයා ලෙස DP Education ප්රධාන විධායක නිලධාරිනී කෞෂි අමරසිංහ මෙනවිය ඒ මොහොතට එක් විය. මෙම පින්කම සඳහා බදුල්ල ශික්ෂණ රෝහලේ විකලාංග ශෛල්ය වෛද්ය කැළුම් චතුරංග විදානගමගේ, කුලියාපිටිය ශික්ෂණ රෝහලේ චානක සෝලංගාරච්චි, රිජ්වේ ආර්යා ළමා රෝහලේ නිර්මාල් මාරසිංහ, ගම්පහ මහ රෝහලේ රුශාන්ත ප්රේමදාස, පුත්තලම මහ රෝහලේ සාෂා හමීඩ්, නාවලපිටිය මහ රෝහලේ කේ කාංදීපන් මහතා ඇතුළු වෛද්යවරුන් සහ සෞඛ්ය කාර්ය මණ්ඩල සම්බන්ධ විය.
මේ සියලු කටයුතු සඳහා මඟපෙන්වන ගුරුදේවෝත්තම පින්වත් ලොකු ස්වාමීන වහන්සේට ද විශේෂයෙන්ම මෙම පින්කම සඳහා උපකාර කළ ඔස්ට්රේලියාවේ මෙල්බන් නුවර මහමෙව්නාව භාවනා අසපුවේ සංඝෝපස්ථායක පූජ්ය කැකිරාවේ බෝධිධම්ම ස්වාමීන් වහන්සේ ඇතුළු සියළුම පින්වත් ස්වාමීන් වහන්සේලාට ද මේ උතුම් කටයුත්තේ බර කරට ගෙන ක්රියා කරන මෙල්බර්න් ජේතවන අසපුවට සම්බන්ධ පින්වත් රවී හේවාවිස්ස මහතා ඇතුළු පින්වත් පිරිසට ද රෝහල් උපකරණ සැපයීම සිදු කළ මැක්වර් කෙයාර් (Mecwa care) ආයතනයේ දිනේෂ්, බැරී (Barry) සහ ඩ්රැගෝ (Drago) යන මහත්වරුන්ටත්, සීවා ලොජිස්ටික් (CEVA LOGISTICT) ආයතනයේ චන්දිම ගුණවර්ධන මහතා ඇතුළු පිරිසටත්, (TNL) නැව් සමාගමටත්, බජට් ට්රක් (Budget Truck) ආයතනයේ ජුලියානා මහත්මියටත් මේ පින් අනුමෝදන් වෙත්වා !!!
මෙම පින්කමේ ප්රවාහන වියදම් දරමින් නැව් ගාස්තු සඳහා මුල්ය දායකත්වය දරණ ධම්මික සහ ප්රසිලා පෙරේරා පදනමේ සම නිර්මාතෘ ගරු ධම්මික පෙරේරා මහතා ඇතුළු පවුලේ සියලු දෙනාට මේ පින් අනුමෝදන් වෙත්වා!!! උතුම් චතුරාර්ය සත්ය ධර්මය අවබෝධ කිරීමේ වාසනාව ලබත්වා!!!
එමෙන්ම DP Education ප්රධාන විධායක නිලධාරිනී කෞෂි අමරසිංහ මෙනවිය ඇතුළු DP Education ආයතනයේ සියලු කාර්ය මණ්ඩලයට මේ පින් අනුමෝදන් වෙත්වා!!! උතුම් චතුරාර්ය සත්ය ධර්මය අවබෝධ කිරීමේ වාසනාව ලබත්වා !!!
මේ පින්කම සඳහා සහභාගී වූ වෛද්ය කාර්යය මණ්ඩල වල සියලු මහත්ම මහත්මීන්ටත්, විශේෂයෙන්ම, අවශ්යතා පවතින රෝහල් සම්බන්ධීකරණය කර දෙමින් සහය වූ බදුල්ල ශික්ෂණ රෝහලේ විකලාංග ශෛල්ය වෛද්ය කැළුම් චතුරංග විදානගමගේ මහතාටත්, මේ වෙනුවෙන් නන් අයුරින් සහය දැක්වූ සියලු දෙනාටත්, රැස්වූ සියලු පින් අනුමෝදන් වෙත්වා. උතුම් චතුරාර්ය සත්ය ධර්මය අවබෝධ කිරීමේ වාසනාව ලබත්වා !!!
